هل تستطيع وزيرة “جوج فرنك” الإجابة عن هذا السؤال؟

مشاهدة 18 ديسمبر 2015 آخر تحديث : الجمعة 18 ديسمبر 2015 - 5:47 مساءً

Sans-titre26-41811111-1-1-

الفقير إلى رحمة ربه وتقاعد الدولة

بقلم: د محمد ناجي

اقرأ أيضا...

أفيلال يا أفيلال ، ها واحد السؤال واعر ، يلى جاوبت عليه غادي تنجحي، ويلى ما جاوبتيش ما عندي ما ندير ليك، اعْـيـيـنا وما ندفعو فيك وانتِ راسك قاصح. ها حنا كنعطوك آخر فرصة باش تنجحي . هاك ها السؤال ، وسمعي مزيان وردي بالك، متبقاشي غير كتدبزي بحال ديما : « إلى كانت 8000 درهم تساوي 2 فرنك ، شحال كتساوي 2000 درهم ؟ » ـ يالله جاوبي . ـ إيوا جاوبي ، مالكي ساكتا. حتى هادي معرفتيهاش. ـ لا عرفت 8000 درهم، ولكن معرفتش ديالاش هاديك الـ 2000 درهم. ـ هاديك راها الخلصة ديال واحد خدام فالبلدية، وكاري وعندو 4 دلولاد ، وكايجيه الضو غالي، والما قطعوه عليه كيعمر غير من الجامع. وباراكا صافي، متخليناش نخرجو على السؤال : يلى كانت 8000 درهم كتساوي 2 فرنك شحال كتساوي 2000 درهم؟ أجيبي ياسيدتي الجميلة، ياذات الإطلالة الرشيقة، والنية المبيتة في ادعاء خدمة الوطن والشعب والعمل على تحسين أوضاعه والنهوض بمستواه الاقتصادي، والحال أنكم لا تعملون إلا لمزيد من استنزاف مال الشعب ومحاولة تقنين ذلك الاستنزاف . ربما أفحمك هذا السؤال. ولأنني متأكد أنك سترسبين حتى ولو طرحت عليك ألف سؤال وسؤال ، فإنني سأزيدك فرصة أخرى، وأطرح عليك سؤالا آخر : « بعد أقل من سنة، سيغادر 395 فردا يحملون صفة برلماني قاعة السيرك، ليحل محلهم 395 وجها آخر يحمل هو أيضا صفة برلماني لمدة خمس سنوات، ثم يغادر كسابقه » . أي أننا بعد ست سنوات سيكون عندنا 790 وجها برلمانيا، غادروا قاعة السيرك وفي محفظتهم مرتب شهري بـ 8000 درهم لكل واحد منهم مدى الحياة. السؤال : « كم سيكون مجموع ما يتقاضاه هؤلاء البرلمانيون جميعا سنة 2021 ؟ » يالله، وا هادا ساهل، وللا حتى هو صعيب عليك. واخا ، ناخدو غير مجلس المستشارين اللي فيهوم يالله 120 واحد . شوفينا من بعد جوج ديال الدورات شحال المجموع اللي غادي يكونوا كيشدو كاملين، يعني 240 مستشار، ومن دورة اخرى 360 … وهكذا. ولكن نبقاو غير فجوج ديال الدورات باراكا. شحال غدي يكونو تيشدو 240 مستشار من دابا جوج الدورات؟ ـ …….. ـ كيفاش جاتك صعيبة حتى هي . إيوا سمحي ليا، راكي زيرو، راهوم غير غلطو ودارو ليك داك الواو فأول الكلمة. راكي مكتقشري حتى زفتة أمسكينة. ها سؤال آخر سهل منهم، يالله. ناخذو الحكومة اللي فيها غير 39 وزير فقط لا غير، مشي بزاف؛ واخا كان تيخص يكون عدد الوزراء فالحكومة ديالنا اكثر من عدد البرلمانيين اللي عندنا فالقبة، حيت الحكومة هي كلشي، وما البرلمانيين راهوم غير كيفرجونا من لربعية لربعية الله يكثر خيرهوم هادوك اللي كيجيوا بعدا . نوبا راهوم كيتسابو، نوبا قصارين مع راسهوم، نوبا كينوض شي واحد وللا شي وحدة يخطب علينا زعما بالحرارة والضريب على الطبلة… وشي شويا ها شي كيشخر، شي مكسل ، شي ماد سيكانو زعما شوفوني راني لابسة ليــبا، شي كينفح باش يعطي نموذج لهادوك اللي كايدافعو على الكيف، شي كيلعب بالبورطابل ممسوقش.. كلها وحالو فيهوم الله يحفظهوم من عينين الحساد. المهم نرجعو للموضوع : من بعد جوج ديال الدورات، يعني من دابا ست سنين غادي يكون عندنا 78 وجها حكوميا يحمل صفة وزير متقاعد، كل واحد فيهوم غدي يكون كياخد ثلاثة دلميون وتسعميات ألف سنتيم فالشهر. شحال غادي يكونوا كيشدو كلهوم؟ فهمتيني دابا وللا نعاود السؤال. يا الله جاوبي. ـ …… واخا غادي نفصلك مزيان : من دابا جوج ديال الدورات برلمانية وجكومية غادي يكون عندنا تبارك الله 790 برلماني كل واحد فيهوم كيشد 8000 درهم فالشهر مدى الحياة. وغادي يكون عندنا الله يزيدنا من خيرو 240 مستشار حتى هوما كل واحد تيشد 8000 درهم فالشهر مدى الحياة. وغادي يكون عندنا 78 وزير كل واحد فيهوم كيشد 39000 درهم فالشهر مدى الحياة . إبوا اجمعي شحال غادي تجي فالشهر، وضربيها فــ 12 باش تعطيك شحال فالعام ، واضربيها فمدى الحياة باش تعطيك شحال غدي يشدو يوم الحساب. ومتنسايش كل خمس سنين كيتزاد 395 يرلماني و 120 مستشار و 39 وزير محترم . يالله جاوبي . !!!!!!!!!!!!!!!!!!!!!!!!! إيوا ملي ما جاوبتيش على هادي نوضي فحالك. ـ زدني غير سؤال واحد عافاك أؤستاد. ـ سؤال واحد فقط . ـ سؤال واحد فاااقط. ـ يالله كولي ليا من بعد جوج أو ثلاثة ديال الدورات حكومية وبرلمانية شنو هي المشاكل اللي يمكن تحلها للشعب المغربي هاديك المبالغ اللي مفروض يكونوا كيشدوها هادوك الوجوه القاصحة ، ، يلا ماكانش هداك التقاعد المنحوس؟ ـ وهاد السؤال صـعَّـبتيه اكثر من الاخرين. ـ عرفتي علاش صعبتو . حيت سمعتك واحد الليلة كنت ناشطة فيها وراشقالك، حتى طيرو ليك داك الفضولي، وانت تكولي ليه : واش هاد التقاعد ديال الوزرا والبرلمانيين هو اللي غدي يحل المشاكل ديال المغرب. دابا شنو ضهر ليك، ياك الشاف ديالكوم تيقول بأنه فسنة 2021 أو 2022 غادي يخوا الصندوق ديال التقاعد. شكون اللي غادي يخويه دابا على هاد الحساب. شوفي شحال من مليار غادي تكون كتخرج من داك الصندوق المزلوط فكل شهر وكتفرق على دوك القلوب القاصحة بلا قانون وبلا شرع، أو بالدارجة : بلا سبة بلا فتيل حبل، كيديوها باردة ما خدمو فيها مردمو. غادي نْـوَلّيـوْ حْـنا هما هادوك اللي تيقولو عليهوم : اخدم يا التاعس للناعس. إيوا هادي غير يلا حسبنا جوج ديال الدورات، أما يلى جينا نحسبو من دابا 20 عام؛ شحال غادي يبقى كيخص الدولة تعطي لدوك لكروش لـمْـتَـرْتـرة فكل شهر، راه غادي يخصها نص الميزانية ديال البلاد تفرقها عليهوم، باش يالله تكفيهوم ويبقاونا على خاطرهوم مساكن. وْهاديك نص المزانية ديال الدولة اللي غادو يكونوا تيكلوها دوك الفيال غير هاكاك هباء منثورا، واش مغاديش تساهم فحل عدد ديال المشاكل فالبلاد؟ مغديش تــنــعَّــش داك الصندوق المنحوس وتخرجو من غرفة الإنعاش مثلا ؟ مغديش توظف مئات الشباب العاطل من حملة الشواهد العليا ؟ مغديش تبني مدارس أو مستشفيات أو معامل ؟ ـ ونــوووضي أبنتي الله يسهل علينا وعليك. داك المنطق ديالك راه خاوي. يلى كان البرلماني والوزير كيخدم خمس سنين ويتخلص على التقاعد، علاش حتى الموظفين الاخرين مايخدموش حتى هما خمس سنين ويشدو التقاعد ويتخلصو عليه؟ ياك المغاربة كلهوم بحال بحال، وكلهوم متساويين فالحقوق والواجبات. إيوا أرانَّـا حتى الموظفين المغاربة الاخرين نعاملوهوم بحال المغاربة اللي فالبرلمان والحكومة؛ كلهوم مغاربة. وللا هادوك مساكن مغاربة غير فلاكارط ناسيونال، ماشي فالقوانين والمشاريع ديال الدولة، وماشي مغاربة فالتقاعد ديال خمس سنين. ـ اسمح نقولك حتى انا واحد الحاجة : راه الوزير كيخدم خمس سنين بحال يلى خدم 15 أو 20 عام. ـ كيفاش، آش كتقولي؟ الوزير يلى خدم خمس سنين بحال يلى خدم 20 عام. أي هاي هاي . وا زوينة هادي. وا سمعي على ودنيك ألعايلة: أجي تشوفي المرا اللي كتخدم مسكينة فالديور الكبار (كبار غير فالمال، ماشي فشي حاجة اخرى)، كتنوض مع الستة دالصباح باش توجد الفطور والبغرير والمسمن، وتقيل واقفة على رْجْـل وحْدة النهار كلو حتى الــ 11 أو 12 ديال الليل عاد كتمشي تنعش؛ حتى كتجمع الطبلة ديال العشا وتغسل المواعن وتنقي الكوزينة وتوجّد الحمام باش فالصباح يكون كايشعل بحال المرايا. هادي يلى خدمت خمس سنين بشحال غادي نحسبوها لها ؟ والبوليسي اللي كيخدم 16 ساعة متصلة شحال من خطرا فالشهر، وكيظل واقف فالشمس، وللا بايت فالبرد والسمرة، والمعلمة اللي كتشد جوج ديال الكيران، وخطاف وكرويلة وتكمل 4 كلمتر على رجليها فالحجر والغيس باش توصل للمدرسة، وكتقري 3 ديال المستويات فنفس الوقت وفقسم واحد. هادي يلى خدمت 5 سنين بشحال نحسبوها لها حتى هي. والجندي الشجاع اللي تينعس بكسوتو وصباطو، وبعيد على اولادو بمآت الكلمترات، مكايشوفهوم غير مرة فالثلث شهور أو اربع شهور، بشحال نحسبو لو خمس سنين ديال الخدمة. والإطفائي اللي كيدخل لوسط الزوبية دلعافية باش يـخَـرّج امرا أو طفل من وسط النار، مضحي بحياتو وبولادو .. والفلاح اللي كـيْـقـيّـل يضرب فالعتلة والفاس ، وزيد وزيد … احْـسبي لي خمس سنين دالخدمة ديال هادو بشحال نحسبوهالهوم ، وردي علي الخبار. ـ …….. ـ بلا ما تخممي، راني عارفك متقدريش تحسبيها.. حيت انتي فعَـوْطْ متحسبيها بالساعات، كتحسبيها بالدراهم. وفهادي عندك الصح. خمس سنين ديال الخدمة فالوزارة يلى حسبناها بالدراهم بحال 20 عام ديال الخدمة ديال أحسن موظف فالدولة؛ ديال أستاذ جامعي مثلا. ـ وسيري خليك ساترة راسك، وكنصحك بلا ما تبقاي كتجي لبحال دوك البرامج ديال البسالات اللي تيفرشو عباد الله. كنتِ مخبعة ما عايق بيك حد، خاليك مخبعة.. احسن ما تخرجي لعباد الله تخلعيهوم، وتطرطقي فيهوم عينيك، وتعتبري همومهوم ومشاكلهوم ودفاعهوم على رزقهوم غير أمور شعبوية وسوقية …هادوك الفليسات أبنـيّـتي راهوم كـيْـحَـيّـدوهوم للناس، فيهوم اللي معندوش باش يكمل الشهر وللا باش يخلص الضو، وكاين فيهوم اللي ما عمرو فحياتو قبض فِـيـدّيـه اكثر من 40 ألف ريال، أما 160 ألف ريال، هاديك راها عندو من الخيال العلمي؛ حتى فالمنام مكيحلمشي يجمعها. تفاهمنا وللا لا. ……. يالله نعاودو من الأول باش تبقاي على خاطرك ومتمشيشي طايرك ليك: « يلى كانت 8000 درهم كتساوي 2 فرنك ، شحال كتساوي … قلة الحيا؟ » د. محمد ناجي [email protected]

كواليس اليوم

التعليقات

  • salamoalikom
    السلام عليكم
    سوال جيد ارجو من الوزيرة الجواب.
    شكرا لصاحب المقال.
    كل ماقيل في المقال هو مع الاسف حقيقة مرة

  • اللهم هذا منكر واحد يخدم حياتو كاملة و يعطيولو 2 فرنك ديال بصح ماشي ديال هاد البوغوصا، في حين واحد يشبع نعاس لمدة 5 سنين و يتخلص متر من 3 ديال لمليون و يعطيوه 8000 درهم ديال التقاعد! هادوا اكتر من السبات ديال الحيوانات، حصنا ثورة و ثورة ديال بصح ضد هاد الشفرة بالعلالي و تقولوا صندوق التقاعد خوا؟! شكون خواه؟ أنا اللي فعمري 38 عام لا خدمة لا دار لا بز؟ لعنة الله عليكم إلى يوم الدين. صدق من قال زيد لعلف فكر المعلوف

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :ان جريدة كواليس الالكترونية تحتفظ بحقها في نشر او عدم نشر اي تعليق لا يستوفي شروط النشر وتشير الى ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة كواليس الالكترونية وهي تلزم بمضمونها كاتبها حصرياً. شروط النشر: ان كواليس الالكترونية تشجّع قرّاءها على المساهمة والنقاش وابداء الرأي وذلك ضمن الاطار الأخلاقي الراقي بحيث لا تسمح بالشتائم أو التجريح الشخصي أو التشهير. كما لا تسمح كواليس الالكترونية بكتابات بذيئة او اباحية او مهينة كما لا تسمح بالمسّ بالمعتقدات الدينية او المقدسات.